Deputetja e Partisë Demokratike, Jorida Tabaku, ka reaguar ashpër ndaj projektit për ndërtimin e një kulle pranë Pallatit të Kongreseve në Tiranë, duke ngritur shqetësime për mungesën e transparencës në procesin e vendimmarrjes.
Përmes një reagimi në rrjetet sociale, Tabaku theksoi se kundërshtimi i saj nuk lidhet me nostalgjinë për ndërtesat e periudhës komuniste, por me mbrojtjen e pronës dhe pasurisë publike.
“Asnjë nostalgji për reliket e vjetra të komunizmit. Vetëm respekt për pronën publike dhe pasurinë publike”, shprehet deputetja demokrate.
Tabaku kritikoi Korporatën e Investimeve, duke pretenduar se ky institucion po vepron mbi pronat publike pa procese të qarta dhe transparente, ndërsa shtroi pyetjen se kush po merr vendime për pasuritë e përbashkëta të qytetarëve.
Sipas saj, situata të ngjashme po shfaqen edhe në projekte të tjera të rëndësishme në vend, si në Zvërnec, aeroportin e Vlorës dhe në Durrës, ku sipas opozitës mungon transparenca dhe konsultimi publik.
“Kush janë këta që i marrin vendimet pa asnjë proces transparent? E njëjta situatë në Zvërnec, në aeroportin e Vlorës, në Durrës e gjetkë. Nuk ka asnjë vendimmarrje transparente”, deklaroi Tabaku.
Deputetja e PD-së argumenton se përqendrimi i pasurive publike në duart e një grupi të vogël interesash po krijon pakënaqësi qytetare dhe po shton protestat në vend.
Sipas saj, ekonomia dhe administrimi i pasurive publike duhet të bazohen në meritokraci, transparencë dhe llogaridhënie, në mënyrë që qytetarët të kenë besim tek institucionet dhe proceset vendimmarrëse.
