Deputetja e Partisë Demokratike, Albana Vokshi, i është drejtuar me një kërkesë zyrtare kryetarit të Kuvendit, Niko Peleshi, duke kërkuar që kryeministri Edi Rama të raportojë në seancë plenare mbi rezultatet e Konferencës së Tetë Ndërqeveritare Shqipëri-Bashkimi Europian.
Në kërkesën e depozituar në Kuvend, Vokshi thekson se më 26 maj 2026 në Bruksel u zhvillua konferenca ndërqeveritare mes Shqipërisë dhe BE-së, e fokusuar te grupkapitulli “Themeloret”, i konsideruar si kapitulli më i rëndësishëm i procesit të negociatave për anëtarësim.
Sipas deputetes demokrate, Kuvendi duhet të informohet zyrtarisht mbi konkluzionet e arritura, kushtet e ndërmjetme të përmbushura dhe kriteret e reja që Shqipëria duhet të realizojë në vijim të procesit të integrimit europian.
Vokshi argumenton se kërkesa e saj mbështetet në Ligjin nr. 15/2015 “Për rolin e Kuvendit në procesin e integrimit evropian të Republikës së Shqipërisë”, i ndryshuar me ligjin nr. 19/2023, i cili detyron Këshillin e Ministrave dhe ministrin përgjegjës për negociatat të raportojnë në Kuvend pas çdo konference ndërqeveritare me Bashkimin Europian.
“Në bazë të këtij detyrimi ligjor, kërkoj përfshirjen në kalendarin e punimeve të raportimit mbi konkluzionet e Konferencës së Tetë Ndërqeveritare Shqipëri-BE dhe kushtet që duhet të përmbushë Shqipëria për grupkapitullin ‘Themeloret’”, thuhet në kërkesën e saj.
Deputetja e opozitës thekson se transparenca mbi procesin e negociatave dhe detyrimet që burojnë prej tij është një domosdoshmëri për Kuvendin dhe opinionin publik, duke kërkuar që qeveria të japë shpjegime të detajuara mbi ecurinë e integrimit europian të vendit.
Kërkesa e Vokshit vjen në një moment kur procesi i negociatave me Bashkimin Europian konsiderohet një nga prioritetet kryesore të institucioneve shqiptare dhe pas zhvillimeve të fundit në kapitujt themelorë të anëtarësimit.
