Momente paniku janë regjistruar pasditen e së enjtes në aeroportin e Frankfurtit në Gjermani, pasi një avion i kompanisë ajrore Lufthansa pësoi një incident teknik teksa ndodhej në pistë.
Bëhet fjalë për një avion tip Boeing 787, i cili sipas raportimeve pësoi dëmtime në pjesën e përparme, pasi mekanizmi i mbështetjes së hundës së avionit u dëmtua, duke bërë që pjesa ballore të përplasej në tokë.
Në momentin e incidentit, avioni ndodhej i parkuar pranë portës së aeroportit dhe ishte planifikuar të kryente fluturimin LH450 nga Frankfurti drejt Los Anxhelosit. Si pasojë e ngjarjes, fluturimi u anulua.
Autoritetet aeroportuale konfirmuan incidentin dhe njoftuan se hetimet për shkaqet dhe rrethanat e plota të ngjarjes kanë nisur menjëherë.
Sipas raportimeve paraprake të Bloomberg News, në bord nuk ndodheshin pasagjerë në momentin e incidentit. Deri tani nuk ka informacion zyrtar për persona të lënduar.
Pamjet e publikuara në rrjetet sociale tregojnë avionin me pjesën e përparme të ulur në pistë, ndërsa ekipet teknike dhe të sigurisë kanë ndërhyrë për menaxhimin e situatës.
Ngjarja ka shkaktuar shqetësim në aeroportin më të madh të Gjermanisë, ndërsa pritet që hetimet të përcaktojnë nëse bëhet fjalë për një defekt teknik apo për një problem tjetër operacional.
