Partia Demokratike do të mbajë nesër, më 30 maj, mbledhjen e Kuvendit Kombëtar, ku priten të miratohen ndryshime të rëndësishme statutore dhe të zgjidhet Këshilli i ri Kombëtar i forcës më të madhe opozitare.
Megjithatë, ndryshe nga praktikat e mëparshme, lista e kandidatëve për Këshillin Kombëtar nuk është bërë ende publike. Delegatët pritet të njihen me emrat vetëm pak para nisjes së punimeve të Kuvendit, duke e mbajtur procesin nën një atmosferë pritjeje dhe kurioziteti.
Një nga çështjet kryesore që do të diskutohet është paketa e ndryshimeve statutore, e cila parashikon rritjen e përfaqësimit të grave dhe diasporës në strukturat drejtuese të partisë, si dhe krijimin e mekanizmave të rinj për përzgjedhjen e kandidatëve politikë. Ndryshimet synojnë gjithashtu modernizimin dhe digjitalizimin e funksionimit të partisë.
Në rendin e ditës është përfshirë edhe ratifikimi i vendimeve të marra nga Këshilli Kombëtar aktual lidhur me procesin e bashkimit të strukturave të partisë gjatë vitit 2024.
Punimet e Kuvendit do të hapen me fjalën e kryetarit të saporizgjedhur të Partisë Demokratike, Sali Berisha, i cili u rikonfirmua në krye të partisë pas procesit zgjedhor të zhvilluar javën e kaluar.
Gjatë Kuvendit do të prezantohen gjithashtu platforma të reja për modernizimin e partisë dhe përfshirjen e diasporës, të cilat do të paraqiten nga drejtues të strukturave përkatëse.
Sipas informacioneve paraprake, në aktivitet do të marrin pjesë edhe përfaqësues dhe të ftuar ndërkombëtarë, ndërsa janë planifikuar mesazhe dhe përshëndetje nga partnerë politikë jashtë vendit.
Kuvendi Kombëtar konsiderohet një moment i rëndësishëm për riorganizimin e Partisë Demokratike dhe përcaktimin e strukturave që do të drejtojnë opozitën në periudhën e ardhshme politike.
