Kryeministri dhe kreu i Partia Socialiste e Shqipërisë, Edi Rama, deklaroi se konferenca ndërqeveritare Shqipëri–Bashkimi Evropian, që zhvillohet sot në Bruksel, pritet të shënojë përmbylljen e fazës hyrëse të negociatave për anëtarësimin e vendit në union.
Gjatë aktivitetit të organizuar në Durrës me rastin e 35-vjetorit të Partisë Socialiste, Rama tha se Shqipëria ka arritur të hapë të gjithë kapitujt e negociatave në një kohë rekord dhe tashmë është gati të kalojë në fazën e mbylljes së tyre.
“Evropa nuk është më një horizont i largët, por një majë që e prekim me sy. Rruga drejt saj është e përcaktuar qartë dhe koha për ta përshkuar është planifikuar bashkë me BE-në”, u shpreh Edi Rama.
Sipas tij, konferenca e sotme zhvillohet mbi bazën e kalendarit të dakordësuar me Komisionin Evropian dhe synimi mbetet që negociatat të përfundojnë brenda vitit 2027.
Kryeministri theksoi se Shqipëria ndodhet më pranë se kurrë anëtarësimit në BE, ndërsa shtoi se “Shqipërinë në BE do ta anëtarësojë Partia Socialiste e Shqipërisë”.
Në fjalën e tij, Rama u ndal edhe te identiteti politik i socialistëve, duke deklaruar se PS mbetet e lidhur me vlerat antifashiste dhe evropiane. Ai foli gjithashtu për raportin e partisë me të kaluarën komuniste, duke theksuar se socialistët “i kanë vlerësuar komunistët për atë që kanë qenë dhe kanë refuzuar komunizmin për atë që ka prodhuar”.
Duke iu referuar opozitës, Edi Rama deklaroi se në krye të saj vazhdon të qëndrojë “një mbeturinë e komunizmit në formën më të neveritshme”.
