Momente paniku janë regjistruar në një fluturim të kompanisë ajrore britanike Jet2, pasi piloti pësoi një atak në zemër gjatë udhëtimit nga Tenerife drejt Birmingham.
Në bord ndodheshin rreth 220 pasagjerë, ndërsa incidenti ndodhi gjatë fluturimit në lartësi të madhe, duke shkaktuar alarm dhe tension në kabinë.
Sipas raportimeve, ekuipazhi reagoi menjëherë duke kërkuar ndihmë mjekësore mes pasagjerëve, ndërsa bashkëpiloti mori kontrollin e avionit dhe realizoi një ulje emergjente në Porto.
Pasagjerët kanë rrëfyer se situata krijoi skena paniku, me fëmijë që qanin dhe stjuardesa që kërkonin një mjek në bord.
“Dritat u ndezën papritur dhe ekuipazhi dukej shumë i shqetësuar”, tha një prej udhëtarëve për mediat britanike.
Avioni u ul në mënyrë të sigurt në aeroportin e Portos rreth orës 02:11 të mëngjesit. Piloti u transportua menjëherë në spital për trajtim mjekësor.
Më pas, pasagjerët vijuan udhëtimin drejt Mbretërisë së Bashkuar me një avion tjetër dhe ekuipazh zëvendësues.
Në reagimin e saj, kompania Jet2 deklaroi se siguria e pasagjerëve nuk ishte vënë në rrezik në asnjë moment dhe kërkoi falje për shqetësimin e shkaktuar.
