Ish-deputeti i Partia Demokratike, Ervin Salianji, ka publikuar në rrjetet sociale fotografi të disa fletëve të votimit nga procesi për zgjedhjen e kryetarit të PD-së, ku anëtarë të partisë kanë shkruar emrin e tij krahas kandidatit të vetëm në garë, Sali Berisha.
Në reagimin e tij, Salianji shprehet se këto vota dhe mesazhe përfaqësojnë një kundërshtim ndaj asaj që ai e cilëson si “farsë” dhe “uzurpim” të Partisë Demokratike.
“Po më vijnë qindra mesazhe dhe foto nga demokratë që, përmes votës, shkrimit të emrit apo refuzimit të farsës, po tregojnë se Partia Demokratike nuk është pronë personale”, shkruan Salianji.
Ai falënderoi mbështetësit nga degë të ndryshme të PD-së në qytete si:
- Shkodër;
- Korçë;
- Vlorë;
- Kukës;
- Fier;
- Dibër;
- Elbasan;
- Gjirokastër;
- Berat;
- Lezhë;
- Durrës;
- Tiranë.
Salianji, i cili u përjashtua nga kandidimi për kreun e PD-së, deklaroi se procesi nuk ofron garë reale dhe se demokratët po reagojnë ndaj mungesës së alternativës politike brenda partisë.
“Kur gara vritet, kur alternativa përjashtohet dhe kur vula përdoret për të mbajtur peng opozitën, demokratët dinë të reagojnë me dinjitet”, theksoi ai.
Në përfundim të reagimit, ish-deputeti u shpreh se mbështetësit e tij nuk do të tërhiqen dhe se synimi i tyre mbetet rikthimi i Partisë Demokratike te anëtarësia dhe qytetarët.
