Italia, Franca, Gjermania dhe Mbretëria e Bashkuar, së bashku me disa shtete të tjera europiane, kanë dalë me një deklaratë të përbashkët ku i kërkojnë Izrael të ndalë menjëherë zgjerimin e vendbanimeve në Bregu Perëndimor dhe të frenojë dhunën e kolonëve.
Në deklaratë thuhet se dhuna e kolonëve ka arritur “nivele të papara”, ndërsa politikat e zgjerimit të vendbanimeve po dëmtojnë seriozisht perspektivën për një zgjidhje me dy shtete.
Shtetet europiane theksojnë se vendbanimet izraelite në Bregun Perëndimor konsiderohen të paligjshme sipas së drejtës ndërkombëtare. Në veçanti, ato shprehën shqetësim për projektet ndërtimore në zonën E1, të cilat sipas tyre do të ndanin territorin palestinez në dy pjesë.
Në dokument kërkohet që qeveria izraelite të ndalë menjëherë zgjerimin e vendbanimeve, të garantojë llogaridhënie për dhunën e kolonëve dhe të hetojë çdo abuzim të mundshëm nga forcat e sigurisë.
Po ashtu, deklarata paralajmëron kompanitë private të shmangin përfshirjen në projekte ndërtimi në zonat e vendbanimeve, duke theksuar se mund të ketë pasoja ligjore dhe reputacionale për çdo subjekt që angazhohet në aktivitete të tilla.
