Xi Jinping pritet të mirëpresë këtë javë në Pekin presidentin rus Vladimir Putin, vetëm katër ditë pasi në kryeqytetin kinez u zhvillua një takim me presidentin amerikan Donald Trump.
Sipas mediave shtetërore kineze, Xi dhe Putin kanë shkëmbyer “letra urimi” përpara vizitës, ndërsa kanë vlerësuar forcimin e partneritetit strategjik mes Kinës dhe Rusisë, në vitin që shënon 30-vjetorin e marrëdhënieve të tyre strategjike.
Vizita e Putinit në Pekin është planifikuar të zhvillohet të martën dhe të mërkurën.
Media kineze e ka paraqitur këtë zhvillim si dëshmi se Pekini po konsolidohet si një qendër kyçe e diplomacisë globale, duke pritur brenda pak ditësh liderët e dy fuqive rivale botërore.
Analistët vlerësojnë se ky intensifikim i kontakteve diplomatike reflekton rolin gjithnjë e më të madh të Kinës në balancat ndërkombëtare, sidomos në një moment tensionesh globale për luftën në Ukrainë, Tajvanin dhe Lindjen e Mesme.
Bashkëpunimi ekonomik mes Kinës dhe Rusisë është rritur ndjeshëm që pas nisjes së luftës në Ukrainë në vitin 2022. Kina është kthyer në një nga importueset kryesore të energjisë ruse, duke blerë qindra miliarda dollarë naftë dhe gaz rus, çka ka ndihmuar ekonominë e Moskës përballë sanksioneve perëndimore.
Ekspertët theksojnë se në fokus të takimeve pritet të jenë çështje strategjike si energjia, siguria globale dhe stabiliteti i tregjeve ndërkombëtare të naftës dhe gazit.
