Iran po sinjalizon një strategji të re presioni global përmes Ngushtica e Hormuzit, duke synuar jo vetëm kontrollin e trafikut të naftës, por edhe të kabllove nënujore që transportojnë internetin dhe të dhënat financiare ndërkombëtare.
Sipas raportimeve të mediave pranë regjimit iranian, Teherani po diskuton vendosjen e tarifave për kompanitë teknologjike ndërkombëtare që përdorin kabllot nënujore të shtrira në zonën strategjike të Hormuzit.
Zëdhënësi ushtarak iranian, Ebrahim Zolfaghari, deklaroi publikisht se Irani do të vendosë tarifa mbi kabllot e internetit që kalojnë nëpër këtë korridor detar.
Sipas mediave iraniane, kompanitë si Google, Microsoft, Meta dhe Amazon mund të detyrohen të paguajnë tarifa licencimi për përdorimin e infrastrukturës nënujore në rajon.
Ekspertët paralajmërojnë se çdo ndërhyrje ndaj kabllove nënujore mund të ketë pasoja të mëdha për ekonominë globale, pasi ato transportojnë pjesën dërrmuese të trafikut ndërkombëtar të internetit, komunikimeve financiare dhe sistemeve cloud.
Sipas analistëve, Teherani po përdor Ngushticën e Hormuzit si një instrument strategjik për të rritur ndikimin e tij ndërkombëtar, sidomos pas tensioneve të fundit me Shtetet e Bashkuara të Amerikës dhe aleatët e saj në Lindjen e Mesme.
Ekspertja e Bloomberg Economics, Dina Esfandiary, deklaroi se Irani synon të tregojë se zotëron mjete presioni që mund të prekin drejtpërdrejt ekonominë globale.
“Ai synon të imponojë një kosto kaq të madhe mbi ekonominë globale, sa askush të mos guxojë ta sulmojë më Iranin”, tha ajo.
Sipas ekspertëve të telekomunikacionit, disa prej kabllove më të rëndësishme ndërkontinentale kalojnë nëpër Gjirin Persik dhe lidhin Europën, Azinë dhe vendet arabe me qendrat globale të të dhënave.
Çdo dëmtim i tyre mund të ndikojë në sistemet bankare, komunikimet ushtarake, tregtinë ndërkombëtare, shërbimet cloud, inteligjencën artificiale dhe trafikun global të internetit.
Ndërkohë, analistët paralajmërojnë se përshkallëzimi i konfliktit në rajon mund të vështirësojë edhe operacionet e mirëmbajtjes dhe riparimit të kabllove nënujore, duke shtuar rrezikun e një krize të gjerë dixhitale në rast tensioni ushtarak.
