Genta Tafa Bungo u betua sot në Kuvend si Komisionere për Mbrojtjen nga Diskriminimi, mes tensioneve dhe akuzave të forta nga opozita.
Gjatë ceremonisë së betimit, kreu i grupit parlamentar të Partia Demokratike, Gazment Bardhi, reagoi ashpër nga salla e Kuvendit, duke e cilësuar zgjedhjen e saj një “turp”.
“Ky është një turp kryetar, një njeri që ka diskriminuar veriun… Një njeri që është përdorur politikisht në procesin e Vettingut… Ky është turp, turp, turp”, deklaroi Bardhi ndërsa Tafa ndodhej në foltore për të bërë betimin.
Kandidatura e Tafës për postin e Komisioneres për Mbrojtjen nga Diskriminimi ishte miratuar më herët në Komisionin për të Drejtat e Njeriut dhe Median vetëm me votat e deputetëve socialistë, pa mbështetjen e opozitës.
Debati në Kuvend u zhvillua në një klimë të tensionuar politike, ku opozita akuzoi mazhorancën për emërime të politizuara në institucionet e pavarura.
Nga ana tjetër, mazhoranca e konsideroi procesin të rregullt dhe në përputhje me procedurat parlamentare.
