Agjencia Ndërkombëtare e Energjisë ka paralajmëruar se Europa po hyn në një fazë kritike për furnizimin me karburant avionësh, pas rënies së ndjeshme të importeve nga Lindja e Mesme si pasojë e tensioneve në Ngushtica e Hormuzit.
Sipas raportit mujor të IEA-s, importet europiane të karburantit ajror nga vendet e Gjirit ranë nga rreth 330 mijë fuçi në ditë në mars, në vetëm 60 mijë fuçi në ditë gjatë prillit.
Agjencia thekson se lufta në Irani dhe bllokimi praktik i korridorit strategjik të Hormuzit kanë kufizuar rëndë qarkullimin e furnizimeve energjetike drejt tregjeve europiane.
Ekspertët vlerësojnë se Europa duhet të zëvendësojë të paktën 80–90% të sasive të humbura për të shmangur mungesat gjatë sezonit veror, kur trafiku ajror rritet ndjeshëm. Megjithatë, importet neto të karburantit për avionë në prill arritën vetëm në rreth 70% të niveleve të muajit mars.
Për të zbutur krizën, vendet europiane kanë rritur importet nga Shtetet e Bashkuara dhe Nigeria, por sasitë e siguruara deri tani nuk kanë qenë të mjaftueshme për të kompensuar humbjet nga Lindja e Mesme.
“Rezervat europiane po bien me shpejtësi, ndërsa furnizimet nga Lindja e Mesme mbeten kryesisht jashtë funksionit”, thuhet në raportin e IEA-s.
Agjencia paralajmëron se pa një stabilizim të situatës në Ngushticën e Hormuzit, tregut europian të energjisë do t’i duhet kohë për t’u rikthyer në normalitet, ndërsa rreziku për çmime më të larta dhe probleme në transportin ajror mbetet i lartë.
