Kremlini ka deklaruar se diskutimet mbi emrin e një përfaqësuesi të Bashkimit Europian për negociata të mundshme me Rusinë janë të parakohshme, për sa kohë vetë BE-ja nuk ka marrë një vendim politik për rifillimin e dialogut me Moskën.
Zëdhënësi i Kremlinit, Dmitry Peskov, komentoi debatet e fundit që u nxitën pasi presidenti rus Vladimir Putin sugjeroi ish-kancelarin gjerman Gerhard Schroeder si një figurë të përshtatshme për të përfaqësuar BE-në në negociata.
Brukseli e refuzoi menjëherë këtë ide, ndërsa në mediat ndërkombëtare u përmend më pas edhe emri i presidentit gjerman në largim, Frank-Walter Steinmeier.
Duke folur për agjencinë ruse RIA Novosti, Peskov tha se emrat nuk kanë rëndësi pa një vendim politik nga Bashkimi Europian.
“Mund të përmendësh çdo emër të njohur. Çështja kryesore është nëse ekziston vullneti politik për të rifilluar dialogun”, deklaroi ai.
Marrëdhëniet mes Rusisë dhe vendeve perëndimore janë tensionuar ndjeshëm që pas nisjes së luftës në Ukrainë në vitin 2022. Bashkimi Europian ka mbajtur një linjë të ashpër ndaj Moskës, duke shmangur kontaktet diplomatike direkte dhe duke vendosur sanksione të shumta.
Megjithatë, sipas raportimeve, në disa kryeqytete europiane po shtohen shqetësimet se një marrëveshje e mundshme mes SHBA-së dhe Rusisë mund të arrihet pa përfshirjen aktive të BE-së.
Shefja e diplomacisë europiane, Kaja Kallas, e hodhi poshtë mundësinë që Gerhard Schroeder të përfaqësojë BE-në, duke e cilësuar ish-kancelarin gjerman si “lobist rus”.
“Para se të flasim me Rusinë, duhet të biem dakord mes nesh se çfarë duam të diskutojmë me ta”, tha Kallas.
Nga ana tjetër, Vladimir Putin deklaroi se vendet europiane mund të zgjedhin këdo si përfaqësues për negociata, me kusht që ai person të mos ketë mbajtur qëndrime armiqësore ndaj Rusisë në të kaluarën.
“Ne nuk i refuzuam bisedimet, ata i refuzuan”, u shpreh presidenti rus.
