Një automjet është përfshirë nga flakët mëngjesin e kësaj të marte në qytetin e Lezhës.
Sipas informacioneve paraprake, makina ndodhej e parkuar brenda oborrit të Dioqezës së Lezhës dhe kishte rreth një javë pa lëvizur.
Fatmirësisht, në momentin e rënies së zjarrit nuk ka pasur persona brenda automjetit dhe nuk raportohet për të lënduar.
Në vendngjarje kanë mbërritur menjëherë forcat zjarrfikëse, të cilat kanë bërë të mundur neutralizimin e flakëve dhe shmangien e përhapjes së zjarrit drejt godinës së ipeshkvisë.
Paraprakisht dyshohet se shkak i incidentit ka qenë një shkëndijë elektrike në automjet.
Policia dhe grupi hetimor po punojnë për zbardhjen e plotë të rrethanave të ngjarjes.
