Ish-deputeti i Partia Demokratike, Ervin Salianji, ka vijuar kritikat e forta ndaj kreut të PD-së, Sali Berisha, duke deklaruar se qëndrimi i tij në krye të partisë po ndihmon indirekt kryeministrin Edi Rama të qëndrojë në pushtet.
Gjatë një takimi me mbështetësit, Salianji vlerësoi rolin historik të Berishës në pluralizmin politik shqiptar dhe në krijimin e Partisë Demokratike, por theksoi se situata aktuale kërkon një brez të ri drejtuesish.
“Sali Berisha është lideri historik i PD-së. Kontributet e tij në vitet e pluralizmit janë të padiskutueshme”, deklaroi ai.
Megjithatë, Salianji u shpreh se Berisha është konsumuar politikisht dhe nuk arrin më të bashkojë opozitën.
“Pas 36 vitesh në politikë, ai sot është i konsumuar politikisht, i izoluar ndërkombëtarisht dhe i paaftë për të bashkuar opozitën”, tha ish-deputeti demokrat.
Ai përdori edhe një metaforë të fortë politike, duke deklaruar se qëndrimi i Berishës në krye të PD-së po funksionon në favor të mazhorancës.
“Qëndrimi i tij në krye të PD dëmton opozitën dhe ndihmon Edi Ramën, duke u kthyer në ‘kambalecin’ që e mban në pushtet”, u shpreh Salianji.
Në përfundim, ai deklaroi se Partia Demokratike duhet të hapë rrugë për një gjeneratë të re politike.
“Sali Berisha është barrë për opozitën dhe duhet t’i hapë krahun një brezi tjetër”, përfundoi Salianji.
