Tensionet brenda Partia Demokratike vijojnë të thellohen, ndërsa kandidatja për drejtimin e saj, Alesia Balliu, ka hedhur akuza të forta ndaj lidershipit aktual.
E ftuar në një studio televizive, Balliu deklaroi se përjashtimi i saj nga gara erdhi menjëherë pasi vendosi të sfidonte kryetarin Sali Berisha, duke shtuar se vendimi është marrë në orët e vona të natës.
Sipas saj, vendimi për të kandiduar erdhi si reagim ndaj asaj që ajo e cilësoi si “padrejtësi” në procesin e primareve dhe mungesë të mbajtjes së premtimeve nga ana e Berishës. Balliu theksoi se partia po funksionon si një “pronë private”, ku zërat kritikë përjashtohen.
Ajo përmendi gjithashtu rastin e Ervin Salianji, duke thënë se përjashtimet dhe vetëpërjashtimet janë një sinjal për çdo anëtar që mendon ndryshe nga drejtuesi.
Balliu u shpreh se Partia Demokratike ka nevojë për një qasje të re dhe për ndryshim lidershipi, duke argumentuar se rezultatet zgjedhore të fundit tregojnë rënie të mbështetjes. Ajo theksoi se synon të përfaqësojë një alternativë që mbështetet te parimet dhe përfshirja e brezit të ri.
Në përfundim, Balliu deklaroi se do të vijojë angazhimin e saj politik brenda partisë, duke kërkuar zbatimin e statutit dhe respektimin e vullnetit të anëtarësisë.
