Historia e Shqipnisë, nga koha e Gjergj Kastrioti Skënderbeu, na mëson një të vërtetë të thjeshtë: respekti nuk kërkohet, fitohet. Dhe fitohet me qëndresë, me karakter dhe me ballë lart — jo me përulje e shfaqje për kamera.
Skënderbeu nuk u shpall “Mbrojtës i Krishterimit” duke trokitur në dyert e Europës, por duke e detyruar atë ta njohë si të barabartë. Ai përfaqësonte një komb që nuk përkulej. Ndërsa sot, duket se përkulja po kthehet në normë.
Shfaqjet e bujshme të “vllaznisë” me Recep Tayyip Erdoğan, “miqësisë” me Aleksandar Vučić apo gjestet e ekzagjeruara ndaj kryeministres italiane Giorgia Meloni nuk janë diplomaci moderne. Janë sinjale alarmi për një politikë që po zëvendëson dinjitetin me spektaklin dhe interesin kombëtar me imazhin personal.
Sot nuk ka nevojë për tanke për të ushtruar ndikim. Mjafton varësia ekonomike dhe presioni politik. Kur një lider e quan “vëlla” dikë që kërkon dominim, ai nuk po ndërton paqe — po pranon nënshtrim.
Në vend që të kërkojnë respekt nga qytetarët e tyre, disa drejtues kërkojnë duartrokitje jashtë vendit. Përulësia përpara botës shpesh shoqërohet me arrogancë ndaj popullit të vet, duke krijuar një hendek të rrezikshëm mes pushtetit dhe qytetarit.
Kur politika shndërrohet në teatër, të rinjtë marrin mesazhin e gabuar: se suksesi arrihet përmes servilizmit dhe jo përmes punës, mendjes dhe krenarisë. Kjo është një trashëgimi që dobëson kombin nga brenda.
Shqipnia është një realitet përtej kufijve të saj zyrtarë, me shqiptarë në çdo cep të rajonit. Ky është potencial i jashtëzakonshëm, por pa një drejtim me dinjitet, ai shpërndahet dhe humbet forcën e vet.
Mesazhi është i qartë dhe i fortë: një shtet që sillet si shërbëtor nuk mund të trajtohet si i barabartë. Diplomacia nuk është servilizëm dhe as spektakël, por mbrojtje e interesit kombëtar me mençuri dhe dinjitet.
Dinjiteti nuk është pronë e një individi, por pasuri e një kombi të tërë. Kush e shet atë për një moment apo për një foto, rrezikon të ardhmen e të gjithëve.
Me respekt për të vërtetën dhe Shqipninë,
Paulin Maçaj
Shkodër
