Ish-deputeti i Partisë së Lirisë, Petrit Vasili, ka reaguar ashpër për gjendjen e rrugëve dytësore në zonën Tiranë–Durrës, duke akuzuar institucionet për neglizhencë dhe keqmenaxhim të fondeve publike.
Në një postim në rrjetet sociale, ai shprehet se qytetarët paguajnë çdo vit taksa të konsiderueshme për mirëmbajtjen e rrugëve, por në realitet infrastruktura mbetet në kushte të këqija. Sipas tij, dhjetëra milionë euro mblidhen nga taksa e mirëmbajtjes, ndërsa rrugët dytësore vazhdojnë të jenë “për faqe të zezë”.
Vasili përmend konkretisht zonat pranë Tregut të Perimeve me shumicë, QTU, si dhe biznese të tjera të mëdha në periferi të Tiranës, ku sipas tij rrugët lidhëse janë në gjendje të degraduar, pavarësisht rëndësisë që kanë për qarkullimin dhe ekonominë lokale.
Ai thekson gjithashtu se rrugë të tjera dytësore, si aksi Vorë–Kashar, paraqiten në të njëjtën situatë problematike, duke ndikuar jo vetëm te bizneset, por edhe te qytetarët që i frekuentojnë çdo ditë.
Në reagimin e tij, Vasili akuzon qeverinë për fokusim te mbledhja e taksave pa reflektim në investime konkrete në infrastrukturë, duke kërkuar ndërhyrje të menjëhershme për përmirësimin e gjendjes së rrugëve.
