Bashkimi Evropian po sjell ndryshime të rëndësishme për të gjithë udhëtarët nga vendet jashtë BE-së, përfshirë edhe shqiptarët. Duke filluar nga 10 prilli 2026, sistemi i ri i hyrje-daljeve, i njohur si EES, do të jetë plotësisht funksional në vendet e European Union dhe zonës Shengen.
Ndryshimi më i madh është se vulat tradicionale në pasaportë do të hiqen dhe do të zëvendësohen me një sistem dixhital që regjistron automatikisht hyrjet dhe daljet e çdo udhëtari. Përveç kësaj, do të mblidhen edhe të dhëna biometrike si fotografia e fytyrës dhe gjurmët e gishtërinjve.
Ky sistem synon të rrisë sigurinë kufitare, të luftojë mashtrimet dhe të identifikojë më shpejt personat që paraqesin rrezik. Sipas të dhënave të Komisionit Evropian, mijëra persona janë refuzuar tashmë për shkak të dokumenteve të pasakta ose mungesës së justifikimit për udhëtimin.
EES do të zbatohet për të gjithë qytetarët jo-BE që udhëtojnë për qëndrime të shkurtra deri në 90 ditë, përfshirë turistët dhe ata që udhëtojnë për biznes. Ndërkohë, përjashtohen qytetarët e BE-së, personat me leje qëndrimi apo viza afatgjata, si dhe disa kategori të veçanta si personeli i transportit apo forcat ushtarake.
Një tjetër efekt i menjëhershëm pritet të jenë vonesat në aeroporte, sidomos në muajt e parë të zbatimit. Autoritetet paralajmërojnë se udhëtarët duhet të paraqiten më herët në aeroport, pasi procesi i regjistrimit biometrik mund të zgjasë dhe të krijojë radhë.
Megjithatë, në afat të mesëm, sistemi pritet të përshpejtojë procedurat kufitare, pasi të dhënat ruhen për disa vite dhe udhëtimet e ardhshme bëhen më të shpejta.
Për udhëtarët shqiptarë, kjo do të thotë më shumë kontrolle në hyrje, por edhe një sistem më modern dhe më të sigurt për lëvizjen drejt Europës.
