Drejtuesi i Departamentit të Bujqësisë në Partinë Demokratike, Eduart Sharka, ka deklaruar se politikat fiskale janë ndër faktorët kryesorë që po ndikojnë në rritjen e çmimeve dhe vështirësitë ekonomike të fermerëve.
Gjatë një takimi me ekspertë, ai theksoi se një pjesë e konsiderueshme e çmimit final që paguajnë qytetarët për produktet bujqësore përbëhet nga taksat. Sipas tij, nga çmimi i një produkti si domatja, rreth 25% deri në 35% shkon në formën e Tatimit mbi Vlerën e Shtuar (TVSH).
Sharka argumentoi se sistemi aktual i taksimit e rëndon produktin vendas në disa faza, duke e bërë atë më të shtrenjtë për konsumatorët dhe më pak fitimprurës për prodhuesit.
Ai theksoi gjithashtu se fermerët shqiptarë përballen me një barrë fiskale më të lartë krahasuar me vendet e tjera europiane, ndërsa situata është përkeqësuar edhe nga heqja e skemës së naftës pa akcizë për bujqësinë.
Sipas tij, kjo ka rritur ndjeshëm kostot e prodhimit dhe ka dobësuar konkurrueshmërinë e produkteve vendase në raport me importet.
Deklaratat e tij vijnë në një kohë kur çmimet e produkteve ushqimore janë rritur dhe fermerët raportojnë vështirësi të shtuara në aktivitetin e tyre.
