Ekspertja për çështjet ndërkombëtare në Partinë Demokratike, Ilda Zhulali, ka deklaruar se procesi i integrimit të Shqipërisë në Bashkimi Evropian është i bllokuar, pavarësisht deklaratave optimiste të qeverisë.
Gjatë një interviste televizive, ajo akuzoi kryeministrin Edi Rama se po përpiqet të paraqesë një realitet të deformuar, ndërsa sipas saj vendet anëtare të BE-së kanë kushtëzuar procesin me çështje serioze si korrupsioni, trafiku i drogës dhe aferat që lidhen me Belinda Balluku.
Sipas Zhulalit, vendimmarrja për avancimin në negociata nuk varet vetëm nga raportet teknike, por nga qëndrimet politike të vendeve anëtare, të cilat, sipas saj, kanë ngritur shqetësime të forta për situatën në Shqipëri.
Ajo u ndal edhe te paralajmërimi i fundit i Ambasadës së SHBA-së për rreziqe të mundshme sigurie, duke e cilësuar atë si një sinjal serioz dhe jo rutinë. Sipas saj, ky paralajmërim lidhet drejtpërdrejt me Shqipërinë dhe jo me një kontekst të përgjithshëm rajonal.
Zhulali argumentoi se qëndrimet e forta politike të Shqipërisë ndaj Iranit, përfshirë rezoluta të veçanta parlamentare dhe prania e opozitës iraniane në vend, mund të kenë ndikuar në rritjen e rrezikut potencial.
Ajo kujtoi gjithashtu se Shqipëria ka qenë më herët objekt i sulmeve kibernetike të lidhura me Iranin, çka sipas saj tregon se kërcënimet mund të jenë reale dhe të shumëllojshme, duke përfshirë edhe forma të ashtuquajtura “hibride”.
Në përfundim, Zhulali theksoi se institucionet shqiptare duhet të reagojnë me seriozitet dhe transparencë, duke shmangur minimizimin e situatave që mund të cenojnë sigurinë dhe proceset integruese të vendit.
