Zv.presidentja e Partia e Lirisë, Erisa Xhixho, ka ngritur alarmin për gjendjen e sistemit shëndetësor në Shqipëri, duke e cilësuar atë në “kolaps të plotë”, veçanërisht për pacientët që vuajnë nga sëmundje të rënda si kanceri.
Sipas saj, pacientët e spitalit Onkologjik po përballen me mungesë të barnave jetike dhe shërbimeve bazë, çka rrezikon drejtpërdrejt jetën e tyre. Ajo përmendi mungesën e disa medikamenteve të rëndësishme për kimioterapi dhe trajtime të avancuara, duke theksuar se mosndjekja e protokolleve mjekësore përshpejton përkeqësimin e sëmundjes.
Xhixho theksoi gjithashtu mungesën e shërbimeve të specializuara si:
- brakiterapia
- trombektomia
- PET-scan
Një tjetër problem, sipas saj, është ndërprerja e analizave mjekësore pas datës 20 të çdo muaji për shkak të mungesës së fondeve.
Ajo akuzoi qeverinë se ka dështuar të përmbushë premtimet për financimin e sektorit të onkologjisë dhe se qytetarët po detyrohen të paguajnë nga xhepi për trajtime private ose jashtë vendit, pavarësisht kontributeve që paguajnë në sistemin shëndetësor.
“Qytetarët paguajnë dy herë: një herë shtetit dhe një herë për të mbijetuar,” u shpreh ajo.
Në deklaratën e saj, Xhixho kërkoi transparencë dhe llogaridhënie nga institucionet, duke bërë thirrje që të zhvillohet një interpelancë me Ministrinë e Shëndetësisë për të sqaruar situatën.
Ajo përfundoi duke theksuar se shëndetësia është një e drejtë themelore dhe se dështimi për ta garantuar atë përbën një problem serioz për funksionimin e shtetit.
