Anëtari i Këshillit Kombëtar të Partia Demokratike e Shqipërisë, Ilir Alimehmeti, ka deklaruar se qeveria e drejtuar nga Edi Rama ndodhet nën presion të shtuar, si nga protestat e opozitës ashtu edhe nga zhvillimet e fundit që lidhen me çështje korrupsioni.
Gjatë një interviste televizive, Alimehmeti theksoi se protestat e vazhdueshme të opozitës janë pjesë e një procesi që, sipas tij, po jep rezultate gradualisht.
Ai u shpreh se situata politike në vend kërkon krijimin e një qeverie teknike, e cila do të garantonte zhvillimin e zgjedhjeve të lira dhe të ndershme, pa ndikim politik mbi institucionet.
Sipas tij, mosheqja e imunitetit për ish-zv/kryeministren Belinda Balluku është një tregues i qartë i marrëdhënies së qeverisë me drejtësinë.
“Jemi në një situatë ku kryeministri ndodhet në një lak të ngushtë dhe po përballet me presion të brendshëm dhe të jashtëm,” u shpreh ai.
Alimehmeti shtoi se opozita do të vijojë betejën në dy fronte: në institucionet shtetërore dhe në rrugë përmes protestave, duke theksuar se zhvillimet e fundit, përfshirë edhe çështje si skandalet në administratë, po e rrisin presionin ndaj qeverisë.
Ai përmendi gjithashtu shqetësime për situatën ekonomike dhe largimin e qytetarëve nga vendi, duke e lidhur këtë me politikat aktuale dhe me mungesën e besimit tek institucionet.
