Kryetari i Partisë Demokratike, Sali Berisha, ka reaguar ashpër ndaj rritjes së çmimit të karburanteve në vend, duke e cilësuar situatën si një barrë të rëndë për qytetarët.
Në një deklaratë për mediat, ai tha se çmimi i naftës në Shqipëri është kthyer në një “instrument tiranie”, që sipas tij ndikon drejtpërdrejt në uljen e mirëqenies së familjeve dhe në rritjen e kostos së jetesës.
Berisha theksoi se dy faktorët kryesorë që ndikojnë në çmimin e lartë janë ngarkesa fiskale dhe kontrabanda e naftës. Sipas tij, taksat mbi karburantin janë më të larta se në vendet e tjera të rajonit dhe në raport me të ardhurat e qytetarëve shqiptarë.
Ai ngriti akuza edhe për hyrjen e naftës kontrabandë në vend, duke pretenduar se kjo dëmton tregun dhe rëndon më tej mbi konsumatorët.
Sipas Berishës, çmimi i lartë i naftës nuk prek vetëm drejtuesit e automjeteve, por gjithë zinxhirin ekonomik, përfshirë bujqësinë dhe çmimet e produkteve ushqimore.
Në përfundim, ai tha se Partia Demokratike ka gati një paketë alternative, e cila synon uljen e barrës fiskale mbi karburantin, duke e përafruar atë me nivelin e vendeve si Kosova dhe Maqedonia e Veriut.
