Presidenti amerikan Donald Trump ka deklaruar se SHBA dhe Iran kanë arritur një marrëveshje me 15 pika, duke përfshirë edhe një armëpushim 5-ditor në konfliktin e përshkallëzuar në Lindjen e Mesme.
Sipas Trump, një nga pikat kryesore të dakordësuara është që Irani të mos zhvillojë armë bërthamore. Ai bëri të ditur gjithashtu se ka urdhëruar pezullimin e sulmeve ndaj infrastrukturës energjetike iraniane për pesë ditë, në pritje të vijimit të bisedimeve.
“Kam udhëzuar shtyrjen e të gjitha sulmeve për një periudhë pesëditore, në varësi të suksesit të diskutimeve,” shkroi Trump, duke e cilësuar procesin si “konstruktiv dhe produktiv”.
Megjithatë, autoritetet iraniane kanë mohuar kategorikisht ekzistencën e negociatave. Një zyrtar i lartë i sigurisë në Teheran deklaroi se nuk ka pasur asnjë bisedim me SHBA-në dhe se tërheqja e Trump nga sulmet lidhet me presionin ushtarak të ushtruar nga Irani.
Në të njëjtën kohë, raportime ndërkombëtare sugjerojnë se SHBA ka kërkuar një takim me zyrtarë të lartë iranianë, përfshirë kryetarin e Parlamentit Mohammad Bagher Ghalibaf, ndërsa janë zhvilluar kontakte edhe mes Uashingtonit dhe Tel Avivit për mundësinë e hapjes së një kanali diplomatik.
Situata mbetet e paqartë dhe e tensionuar: nga njëra anë SHBA sinjalizon gatishmëri për marrëveshje, ndërsa nga ana tjetër Irani vazhdon të mohojë çdo dialog dhe paralajmëron kundërpërgjigje në rast të sulmeve të reja.
Zhvillimet vijnë në një moment kritik për rajonin, ku përplasja mes palëve ka ndikuar drejtpërdrejt në tregjet globale të energjisë dhe në sigurinë ndërkombëtare, sidomos për shkak të situatës në Ngushticën e Hormuzit, një nga korridoret më të rëndësishme për transportin e naftës në botë.
