Kompanitë ajrore më të mëdha në Europë kanë paralajmëruar rritje të çmimeve të biletave, si pasojë e kostove në rritje të karburantit, të lidhura me përshkallëzimin e konfliktit në Lindjen e Mesme.
Sipas drejtuesve të industrisë, bllokimi i cisternave të naftës në rajonin e Gjirit Persik ka ndikuar drejtpërdrejt në rritjen e çmimeve të karburantit, duke rritur ndjeshëm shpenzimet operative të linjave ajrore.
Drejtori ekzekutiv i Ryanair, Michael O’Leary, theksoi se kompanitë mund të përballojnë përkohësisht goditjen, por në fund kostot shtesë do të transferohen te pasagjerët.
Në të njëjtën linjë, drejtori i Deutsche Lufthansa, Carsten Spohr, deklaroi se marzhet e fitimit janë shumë të ulëta për të absorbuar rritjen e çmimeve të karburantit. Sipas tij, fitimi mesatar për pasagjer është rreth 10 euro, çka e bën të pamundur mbulimin e kostove shtesë pa rritur çmimet.
Ekspertët paralajmërojnë se nëse tensionet në rajon vazhdojnë, industria e aviacionit mund të përballet me një valë të re shtrenjtimi, duke ndikuar drejtpërdrejt në udhëtimet ajrore dhe turizmin në muajt në vijim.
