Një analizë e Radio Evropa e Lirë hedh dritë mbi përpjekjet e transmetuesit shtetëror iranian IRIB për të ndikuar në hapësirën mediatike të Bosnje dhe Hercegovinë, përmes shpërndarjes së materialeve dhe përmbajtjeve të gatshme për publikim.
Sipas raportit, IRIB u ka dërguar mediave në Sarajevë video dhe njoftime që paraqesin një realitet të filtruar nga ngjarjet në Iran. Në disa raste, protestat kundër regjimit janë përshkruar si akte të dhunshme apo të nxitura nga jashtë, ndërsa tubimet proqeveritare janë promovuar si reagime masive popullore.
Këto materiale janë shpërndarë përmes email-eve dhe bashkëpunimeve me media lokale, në përpjekje për të depërtuar në tregun informativ të vendit ballkanik. Megjithatë, sipas analizës, ndikimi i tyre ka qenë i kufizuar dhe jo gjithmonë i transmetuar gjerësisht.
IRIB, i cili është nën kontrollin e drejtpërdrejtë të udhëheqjes iraniane dhe nën sanksione nga Bashkimi Evropian dhe SHBA, operon prej dekadash në Bosnje përmes projekteve si “Sahar Balkan TV”. Ky kanal prodhon përmbajtje në gjuhën boshnjake dhe shpërndan materiale që shpesh reflektojnë narrativën zyrtare të Teheranit.
Analistët theksojnë se strategjia e Iranit përfshin jo vetëm media, por edhe ndikim përmes bursave studentore, instituteve kulturore dhe rrjeteve akademike. Përmbajtja shpesh prodhohet në Teheran dhe më pas përshtatet në gjuhët lokale për audienca të ndryshme.
Megjithatë, ndikimi i Iranit në Bosnje dhe Hercegovinë është zbehur ndjeshëm që pas viteve ’90, për shkak të presionit ndërkombëtar dhe orientimit të vendit drejt integrimit në Bashkimin Evropian.
Sipas ekspertëve, përpjekjet e IRIB-it për të ndikuar në opinionin publik në Ballkan konsiderohen të kufizuara dhe shpesh të dështuara, pasi shumë redaksi lokale tregojnë kujdes ndaj përmbajtjeve që mund të konsiderohen propagandistike.
Në fund, analiza nënvizon se mbrojtja më e fortë ndaj ndikimeve të tilla mbetet profesionalizmi i mediave dhe aftësia e gazetarëve për të dalluar informacionin e verifikuar nga propaganda.
