Një rritje e shpejtë e rasteve me meningjit është raportuar në Mbretëria e Bashkuar, ku autoritetet shëndetësore kanë konfirmuar 20 raste të sëmundjes invazive meningokoksike në rajonin e Kentit.
Sipas UK Health Security Agency, pesë raste të reja janë identifikuar vetëm gjatë ditës së fundit, duke e cilësuar situatën si një nga shpërthimet më të shpejta të kësaj sëmundjeje në zonë. Nga këto, nëntë raste janë konfirmuar në laborator, ndërsa të tjerat janë ende nën mbikëqyrje.
Autoritetet bëjnë me dije se gjashtë nga rastet e konfirmuara i përkasin formës MenB, një nga variantet më të zakonshme dhe potencialisht më të rrezikshme të meningjitit bakterial.
Për të frenuar përhapjen, është vendosur nisja e një fushate vaksinimi që do të përfshijë rreth 5,000 studentë në University of Kent në Canterbury, një nga zonat më të prekura nga shpërthimi.
Ekspertët theksojnë se meningjiti është një infeksion serioz që prek mbështjellësen e trurit dhe palcës kurrizore dhe shkaktohet nga baktere si Neisseria meningitidis. Ky bakter mund të qëndrojë në organizëm pa simptoma, por në raste të caktuara mund të kalojë në gjak dhe të shkaktojë komplikacione të rënda, madje edhe kërcënuese për jetën.
Zyrtarët shëndetësorë kanë bërë të ditur se deri tani janë shpërndarë rreth 2,500 doza antibiotikësh për kontaktet e ngushta të rasteve të identifikuara, duke përfshirë studentë dhe persona që kanë frekuentuar ambiente të caktuara në Kent gjatë ditëve të fundit.
Autoritetet vijojnë të bëjnë thirrje për kujdes dhe reagim të shpejtë, duke theksuar se trajtimi i menjëhershëm është thelbësor për të shmangur pasojat e rënda dhe për të ndalur përhapjen e mëtejshme të infeksionit.
