Gazetarja Ambrozia Meta ka treguar detaje nga momentet e tensionuara gjatë dhe pas konferencës për shtyp të kryeministrit Edi Rama, ku ajo dhe gazetari Isa Myzyraj u përjashtuan nga aktivitetet e ardhshme mediatike të kreut të qeverisë.
Në një intervistë për Syri TV, Meta rrëfeu se situata u përshkallëzua pasi kryeministri ndërpreu konferencën dhe kërkoi që ajo të largohej nga salla.
Sipas saj, ndërsa po përpiqej të dilte nga ambientet e Kryeministrisë, një punonjës i Gardës nuk e lejoi të kalonte për disa momente, pasi Rama po kalonte në korridor.
“Kur dola nga salla për të mos e agravuar situatën, në korridor u përballëm sërish me kryeministrin, i cili më tha se jam e përjashtuar përgjithmonë nga konferencat e tij,” tregoi gazetarja.
Ajo shtoi se në ato momente situata ishte e tensionuar dhe se kryeministri, sipas saj, përsëriti me zë të lartë se ajo nuk do të merrte më pjesë në konferencat e tij.
Meta tha gjithashtu se disa kolegë të saj u ngritën për ta shoqëruar jashtë, pasi situata në korridor ishte e acaruar dhe ekzistonte frika se tensioni mund të përshkallëzohej më tej.
Sipas gazetares, reagimi i kryeministrit mund të lidhet me tensionin politik të krijuar nga zhvillimet e fundit dhe debatet rreth çështjeve që janë aktualisht në qendër të vëmendjes publike.
