Mesazhet nga institucionet europiane për procesin e integrimit të Shqipërisë në Bashkimin Europian po bëhen gjithnjë e më të forta, duke theksuar se lufta kundër korrupsionit dhe funksionimi i shtetit të së drejtës mbeten kushte thelbësore për avancimin e negociatave.
Në raportin më të fundit për zgjerimin e BE-së, Parlamenti Europian thekson se anëtarësimi i vendeve kandidate duhet të mbetet i bazuar në meritë dhe se nuk mund të ketë përjashtime nga standardet themelore të demokracisë dhe sundimit të ligjit.
Eurodeputetët paralajmërojnë se vonesat në procesin e zgjerimit mund të krijojnë “zona gri gjeopolitike”, të cilat mund të bëhen të ndjeshme ndaj ndikimit të aktorëve të jashtëm. Megjithatë, ata theksojnë se zgjerimi nuk mund të përshpejtohet nëse vendet kandidate nuk realizojnë reforma reale.
Raporti nënvizon se sundimi i ligjit, pavarësia e gjyqësorit, lufta kundër korrupsionit, liria e medias dhe mbrojtja e të drejtave të njeriut janë elementë të panegociueshëm në procesin e integrimit.
Në këtë kontekst, çështjet që lidhen me hetimet ndaj zyrtarëve të lartë dhe mundësia që drejtësia të veprojë pa pengesa politike konsiderohen një test i rëndësishëm për seriozitetin e reformave në Shqipëri.
Parlamenti Europian ka kërkuar gjithashtu monitorim më të fortë të reformave në vendet kandidate dhe mbështetje të shtuar për shoqërinë civile pro-evropiane, ndërsa ka theksuar rëndësinë e bashkëpunimit në fusha si siguria, infrastruktura dhe lufta kundër manipulimit të informacionit.
Raporti për zgjerimin u miratua nga eurodeputetët me 385 vota pro, 147 kundër dhe 98 abstenime, duke riafirmuar se rruga drejt Bashkimit Europian do të varet nga rezultatet konkrete të reformave në vendet që synojnë anëtarësimin.
