Një debat i fortë u zhvillua në një studio televizive mes avokatit Spartak Ngjela dhe Ilirjana Kuçanës, anëtare e Këshillit Kombëtar të Partisë Demokratike, teksa po diskutohej për situatën e opozitës.
Përplasja nisi kur Ngjela përmendi sondazhe që, sipas tij, tregojnë rezultate jo të favorshme për Partinë Demokratike. Kuçana vuri në dyshim sondazhet e përmendura, duke pyetur se nga cilat burime vinin ato.
Ngjela u përgjigj se bëhej fjalë për sondazhe të realizuara nga “perëndimorët”, ndërsa reagimi i Kuçanës solli një përshkallëzim të debatit mes tyre.
Gjatë diskutimit, Ngjela i kërkoi bashkëbisedueses të ishte serioze në debat, duke thënë: “Me mua ji serioze, s’je te Saliu këtu”.
Kuçana iu përgjigj duke kujtuar se edhe vetë Ngjela kishte qenë më parë pjesë e së njëjtës politikë, ndërsa shtoi se ish-kryeministri Sali Berisha e kishte respektuar atë gjatë kohës së bashkëpunimit.
Debati u tensionua më tej kur Ngjela paralajmëroi se mund të largohej nga studioja, duke deklaruar se nuk pranon që të flitet në atë mënyrë me të gjatë një debati politik.
Pavarësisht tensioneve, diskutimi vijoi më tej me replika mes dy të ftuarve lidhur me zhvillimet në opozitë dhe situatën politike në vend.
