Kuvendi i Shqipërisë, me votat e shumicës socialiste, ka rrëzuar kërkesën e Prokurorisë së Posaçme (SPAK) për heqjen e imunitetit dhe arrestimin e deputetes Belinda Balluku, e cila po hetohet për shkelje të barazisë në tendera gjatë kohës kur drejtonte Ministrinë e Infrastrukturës dhe Energjisë.
Vendimi i mazhorancës bllokon për momentin mundësinë e arrestimit të ish-zëvendëskryeministres, ndërsa hetimet e SPAK pritet të vijojnë pa masë sigurie ndaj saj. Raporti që kundërshton arrestimin u paraqit në Këshillin e Mandateve nga deputetët e Partisë Socialiste dhe u argumentua se nuk ekzistojnë prova që tregojnë rrezik arratisjeje apo prishje provash nga Balluku.
Sipas raportit të paraqitur nga ish-ministri i Drejtësisë, Ulsi Manja, akuza për “shkelje të barazisë në tendera” mund të hetohet pa vendosur masën e arrestit, duke theksuar se zgjerimi i hetimit nga SPAK nuk përbën arsye për ashpërsimin e masave ndaj deputetes.
Debati politik u ashpërsua më tej pasi kryeministri Edi Rama kritikoi publikisht veprimet e prokurorisë. Ai deklaroi se masa e pezullimit ndaj Ballukut ishte e pajustifikuar dhe se kërkesa për arrestim ishte e nxituar dhe e pabazuar në prova të mjaftueshme.
Rama theksoi se ndaj ish-ministres nuk ka akuzë për korrupsion apo përfitim personal, por vetëm dyshime për pabarazi në një procedurë tenderimi të zhvilluar disa vite më parë.
Kryeministri gjithashtu vuri në dyshim përdorimin e disa përgjimeve telefonike si prova për kërkesën e arrestit, duke argumentuar se ato nuk përmbajnë elemente të qarta që lidhen drejtpërdrejt me Ballukun dhe se nuk janë verifikuar plotësisht.
Çështja ka krijuar tensione të forta politike dhe institucionale, pasi për herë të parë pas krijimit të SPAK, Kuvendi ka refuzuar arrestimin e një figure të rëndësishme të qeverisë. Ndërkohë, hetimet ndaj Ballukut pritet të vijojnë në organet e drejtësisë.
