Kreu i Partisë Demokratike, Sali Berisha, ka akuzuar kryeministrin Edi Rama se me veprimet e tij po dëmton perspektivën europiane të Shqipërisë dhe po cenon funksionimin e drejtësisë në vend.
Gjatë fjalës së tij në takimin e përjavshëm me mbështetësit para Kryeministrisë, Berisha iu drejtua intelektualëve, mjekëve, mësuesve dhe juristëve që të mos qëndrojnë, sipas tij, indiferentë ndaj zhvillimeve politike në vend.
Ai theksoi se konformizmi me qeverinë aktuale është një gabim i madh dhe u bëri thirrje përfaqësuesve të inteligjencës shqiptare që të reagojnë dhe të mbrojnë interesin publik.
Sipas Berishës, mazhoranca po përdoret nga kryeministri si një mburojë politike për të mbrojtur veten nga akuzat që lidhen me korrupsionin dhe abuzimin me pushtetin.
Lideri i opozitës deklaroi se, sipas tij, veprime të tilla rrezikojnë procesin e integrimit europian të Shqipërisë dhe dëmtojnë imazhin e vendit.
“Nuk mund të ketë shtet kur shkelet kushtetuta dhe asgjësohet drejtësia. Në atë moment nuk kemi më shtet, por një bandë”, u shpreh Berisha gjatë fjalës së tij.
