Shumica socialiste në Kuvendin e Shqipërisë ka vendosur të mos i japë autorizimin Prokurorisë së Posaçme (SPAK) për arrestimin e ish-zëvendëskryeministres dhe deputetes Belinda Balluku.
Në raportin e hartuar nga deputetët socialistë argumentohet se ndaj Ballukut nuk ka akuza për korrupsion dhe se nuk ekziston rreziku i arratisjes apo i prishjes së provave, siç pretendohet nga SPAK. Sipas raportit, masa e pezullimit nga detyra si anëtare e Këshillit të Ministrave nuk prodhon më pasoja juridike, pasi ajo nuk ushtron më funksione ekzekutive në qeveri.
“Narrativa mbi të cilën Prokuroria e Posaçme ka ndërtuar kërkesën për masa më të rënda sigurie mbetet hipotetike, pasi lidhet me ushtrimin e funksioneve ekzekutive që deputetja nuk i ushtron më”, thuhet në raportin e shumicës.
Deputeti socialist Ulsi Manja, duke lexuar raportin në Këshillin e Mandateve, deklaroi se SPAK nuk po pengohet në hetimet e tij dhe se çështja mund të vijojë normalisht në drejtësi.
Nga ana tjetër, kryeministri Edi Rama gjatë mbledhjes së grupit parlamentar të PS-së i cilësoi hetimet ndaj Ballukut si një “gjyq publik”, duke theksuar se hetimi duhet të vazhdojë dhe se vendimet përfundimtare i takojnë gjykatave.
Ndërkohë, opozita ka kundërshtuar qëndrimin e mazhorancës dhe ka rekomanduar miratimin e kërkesës së SPAK për arrestimin e Ballukut, duke u mbështetur në provat e paraqitura nga prokuroria, jurisprudencën kushtetuese dhe opinionet e Komisionit të Venecias.
Votimi për imunitetin e Belinda Ballukut pritet të zhvillohet në seancën plenare të së enjtes, më 12 mars, ndërsa opozita ka paralajmëruar edhe një protestë para Kuvendit në të njëjtën ditë.
