Kryeministri Edi Rama i dorëzoi Presidentit Bajram Begaj propozimet për 7 ndryshime në qeveri, ndërsa dekreti për shkarkimin dhe emërimin e ministrave të rinj pritet të firmoset brenda afatit kushtetues 7-ditor.
Takimi mes Ramës dhe Begajt u zhvillua në Pallatin e Brigadave dhe zgjati rreth 40 minuta. Sipas procedurës, pas dekretimit nga Presidenti, ndryshimet kalojnë për votëbesim në Kuvend dhe më pas ministrat e rinj bëjnë betimin përpara Kreut të Shtetit.
Ndryshe nga rastet e mëparshme, këtë herë dekreti nuk është firmosur menjëherë, duke nxitur diskutime politike mbi arsyet e kësaj pritjeje.
Pse po vonon dekretimi?
Sipas raportimeve dhe analizave politike, vonesa lidhet me situatën e krijuar pas largimit të Belinda Ballukut nga posti i zëvendëskryeministres dhe ministres së Infrastrukturës dhe Energjisë.
Në mbledhjen e Grupit Parlamentar të PS, Rama vlerësoi punën e Ballukut ndër vite, duke theksuar se largimi i saj krijon një boshllëk të madh në qeveri. Për këtë arsye, sipas zërave kritikë, po kërkohet kohë për të garantuar tranzicionin e projekteve në proces.
Projektet në fokus dhe hetimet
Ndër projektet më të përmendura është Tuneli i Llogarasë, për të cilin SPAK ka hapur hetime lidhur me procedurat e tenderimit. Në dosje përmendet kompania turke “İntertas İnşaat”, ndërsa janë ngritur dyshime për favorizim dhe kosto shtesë.
Po ashtu, përmenden edhe projekte të tjera infrastrukturore si Aeroporti i Vlorës, rruga Thumanë–Kashar, si dhe kontrata në sektorin energjetik, të cilat janë objekt verifikimi nga organet e drejtësisë.
Ndërkohë, Presidenti ka afat ligjor për t’u shprehur mbi dekretet, ndërsa mbetet për t’u parë nëse do të ketë një firmosje brenda ditëve në vijim apo do të përdoret i gjithë afati kushtetues.
Situata po ndiqet me interes politik, pasi lidhet drejtpërdrejt me zhvillimet e fundit në qeveri dhe me hetimet që janë në proces.
