Gazetari Armand Shkullaku, i ftuar në një studio televizive, ka komentuar vizitën e kryeministrit Edi Rama në SHBA dhe zhvillimet e fundit lidhur me kërkesën e SPAK për heqjen e imunitetit të zv.kryeministres Belinda Balluku.
Shkullaku u shpreh skeptik për ndikimin real që vizita në SHBA mund të ketë në planin e brendshëm politik, duke theksuar se një takim apo foto zyrtare nuk përkthehet domosdoshmërisht në mbështetje konkrete apo “oksigjen politik” për qeverinë.
Duke u ndalur te çështja Balluku, ai e cilësoi kërkesën e SPAK për arrest si një goditje direkte ndaj kryeministrit. Sipas tij, situata e krijuar tregon se mazhoranca, pavarësisht 85 mandateve, nuk ndodhet në pozitat e forta politike që ka pasur më parë.
Shkullaku përmendi edhe tensionet mes qeverisë dhe SPAK-ut, si dhe çështje të tjera si ajo e AKSHI-t, duke argumentuar se këto zhvillime përbëjnë një sfidë serioze për qeverinë dhe mund të sinjalizojnë një fazë të re në raportin mes pushtetit politik dhe institucioneve të drejtësisë.
