Gjatë udhëtimit drejt Gjermanisë për të marrë pjesë në Konferencën e Sigurisë në Mynih, sekretari amerikan i Shtetit, Marco Rubio, deklaroi se bota po përjeton një transformim të thellë gjeopolitik, duke paralajmëruar se marrëdhëniet ndërkombëtare po hyjnë në një fazë të re.
“Bota po ndryshon shumë shpejt para syve tanë. Po jetojmë në një epokë të re në gjeopolitikë dhe kjo kërkon nga të gjithë ne të rishqyrtojmë rolin tonë,” u shpreh ai para gazetarëve.
Rubio theksoi se partnerët evropianë kërkojnë qartësi mbi drejtimin që do të ndjekë SHBA-ja dhe mbi mënyrën se si do të bashkëpunojnë në të ardhmen. Ai sinjalizoi një qasje më të matur në krahasim me deklaratat e ashpra të bëra një vit më parë nga figura të tjera të administratës amerikane.
Tensionet mes SHBA-së dhe disa vendeve evropiane janë shtuar pas deklaratave të presidentit Donald Trump mbi rëndësinë strategjike të Groenlandës për sigurinë kombëtare amerikane, çka ka shkaktuar reagime të forta në Evropë.
Në prag të konferencës, një grup ish-ambasadorësh amerikanë në NATO dhe ish-komandantësh të lartë në Evropë publikuan një letër të hapur, duke i bërë thirrje Uashingtonit të ruajë angazhimin ndaj aleancës perëndimore dhe bashkëpunimit transatlantik.
Konferenca e Sigurisë në Mynih zhvillohet në një moment delikat për rendin global, mes sfidave të reja të sigurisë, rritjes së tensioneve gjeopolitike dhe rishikimit të roleve tradicionale të fuqive kryesore botërore.
