Deputeti i Partisë Demokratike, Tritan Shehu, ka komentuar protestën e zhvilluar nga opozita, duke theksuar se ajo përfaqësonte një reagim të gjerë qytetar kundër asaj që e cilësoi si një “shtet-regjim” që vepron jashtë ligjit.
I ftuar në një studio televizive, Shehu u shpreh se protestat, megjithëse organizohen nga Partia Demokratike, kanë mbështetje të gjerë popullore, pasi sipas tij, qytetarët po përballen me korrupsion të thellë, dobësim të demokracisë dhe presion ndaj institucioneve.
Ai nënvizoi se rasti i zëvendëskryeministres Belinda Balluku përfaqëson kulmin e pakënaqësisë publike, duke e lidhur atë me debatet për heqjen e imunitetit parlamentar. Sipas Shehut, bllokimi i këtij procesi ka rritur tensionin dhe mosbesimin ndaj institucioneve.
Shehu tha se protesta arriti objektivin e saj duke treguar vendosmërinë e qytetarëve dhe duke tërhequr vëmendjen edhe në arenën ndërkombëtare. Ai shtoi se pasqyrimi në mediat e huaja ishte më i gjerë krahasuar me herët e tjera, çka sipas tij tregon rëndësinë e situatës.
Deputeti demokrat kritikoi gjithashtu reagimin e policisë gjatë protestës, duke e konsideruar përdorimin e forcës si të tepruar dhe jo proporcional. Në përfundim, ai bëri thirrje për vazhdim të reagimit qytetar, duke theksuar se, sipas tij, përballja me një regjim kërkon mobilizim të gjerë shoqëror.
