Analisti Mentor Kikia ka komentuar protestën e fundit të Partisë Demokratike, duke theksuar se opozita ka ndryshuar metodologjinë e saj të veprimit krahasuar me protestat e mëparshme.
Sipas tij, pas protestës së 24 janarit u shënua një kthesë në strategjinë e opozitës, me rritje të intensitetit, shpeshtimit dhe agresivitetit të tubimeve. Ai vlerëson se ky kurs i ri synon të shtojë presionin mbi qeverinë për ta detyruar të tërhiqet dhe për të hapur rrugën drejt një qeverie tranzitore me mandat njëvjeçar, që do të përgatiste vendin për zgjedhje të parakohshme.
Megjithatë, Kikia thekson se elementi vendimtar mbetet numri i pjesëmarrësve. Sipas tij, në protesta jo të gjithë janë të gatshëm për konfrontim dhe në momentet e dhunës, një pjesë e madhe e protestuesve mbeten spektatorë, ndërsa vetëm një pakicë përfshihet në përplasje.
Ai paralajmëron se rritja e agresivitetit mund të ketë efekt të dyfishtë: nga njëra anë mund të mobilizojë më shumë mbështetës të vendosur për përballje, por nga ana tjetër mund të largojë qytetarët që nuk duan të përfshihen në situata të dhunshme.
Në fund, Kikia thekson se kryeministri Edi Rama nuk ka sinjalizuar gatishmëri për dorëheqje, pavarësisht çështjeve që kanë përfshirë zyrtarë të lartë në hetime. Sipas tij, pikërisht kjo situatë ka shtyrë opozitën drejt përshkallëzimit të aksionit politik në rrugë.
