Kreu i Partisë Demokratike, Sali Berisha, mbajti një fjalim përpara Kryeministrisë, ku akuzoi qeverinë për pengim të drejtësisë dhe mbrojtje të korrupsionit. Ai u shpreh se mesazhi i përcjellë nga Brukseli ka qenë i qartë: drejtësia nuk duhet të pengohet, përndryshe rruga e integrimit europian rrezikon të mbyllet.
Berisha u bëri thirrje qytetarëve nga e gjithë Shqipëria që të mblidhen nesër në Tiranë, duke e cilësuar protestën si një betejë vendimtare për demokracinë dhe të ardhmen europiane të vendit. Ai i drejtoi një apel edhe forcave të rendit, duke i ftuar të qëndrojnë në anën e qytetarëve dhe të interesit publik.
Sipas tij, protestat janë një reagim i ligjshëm kundër një qeverie që, siç tha, ka humbur legjitimitetin dhe po dëmton perspektivën europiane të Shqipërisë. Berisha theksoi se vetëm përmes reagimit qytetar mund të rikthehet shteti ligjor dhe besimi te drejtësia.
