Propozimit të deputetit Bujar Leskaj për pjesëmarrjen e Partisë Demokratike në Komisionin e Reformës Administrativo-Territoriale i janë bashkuar edhe deputetë të tjerë të PD-së, duke u rreshtuar në favor të një qasjeje institucionale dhe aktive të opozitës në procesin e reformave.
Ideja e Leskajt u artikulua fillimisht përmes një reagimi publik, ku ai theksoi se mungesa e opozitës në një reformë kaq të rëndësishme i lë mazhorancës hapësirë për vendimmarrje të njëanshme dhe përjashton zërin opozitar nga rishikimi i hartës territoriale.
Gjatë diskutimeve të zhvilluara sot në mbledhjen e Grupit Parlamentar të PD-së, këtij qëndrimi i janë bashkuar edhe deputetët Bledjon Nallbati, Xhelal Mziu, Oerd Bylykbashi, Ina Zhupa, Tritan Shehu, Arjan Ndoja, Bledi Himçi dhe Luan Baçi.
Deputetët kanë theksuar se bojkotimi i proceseve parlamentare e dobëson rolin përfaqësues të Partisë Demokratike dhe i hap rrugë mazhorancës që të miratojë ndryshime të njëanshme, pa debat dhe pa balancë politike.
Sipas këtij grupimi brenda PD-së, Reforma Territoriale nuk mund të trajtohet si një proces politik i mbyllur, por duhet të zhvillohet me debat të gjerë, transparencë dhe përfshirje të opozitës, në mënyrë që rezultati final të jetë funksional dhe në interes të qeverisjes vendore dhe qytetarëve.
