Marina Kineze po intensifikon ndjeshëm përgatitjet për luftën kundër nëndetëseve armike, duke vendosur në qendër të strategjisë së saj shkatërruesit e Tipit 055, të konsideruar si anijet më të avancuara luftarake që Pekini ka ndërtuar ndonjëherë. Një prej tyre, CNS Zunyi, ka marrë së fundmi pjesë në stërvitje komplekse detare që kanë testuar në kushte reale aftësinë për të zbuluar, ndjekur dhe neutralizuar nëndetëset kundërshtare në ujëra të thella.
Gjatë këtyre ushtrimeve janë simuluar skenarë realë lufte, ku janë analizuar faktorë kritikë si struktura e shtratit të detit, kushtet akustike dhe bashkërendimi në kohë reale i informacionit nga sonarët, sensorët nënujorë dhe helikopterët luftarakë. Këto elementë po kthehen në shtylla kryesore të doktrinës së re detare kineze, veçanërisht në zona me rëndësi strategjike si Deti i Kinës Jugore.
Sipas vlerësimeve ushtarake, Tipi 055 nuk është thjesht një shkatërrues klasik, por një qendër komande lundruese, e aftë të koordinojë operacione të ndërlikuara detare dhe ajrore. Falë sistemeve të avancuara të zbulimit dhe komunikimit, kjo superanije synon të zvogëlojë avantazhin tradicional të nëndetëseve, të cilat për dekada kanë qenë arma më e fshehtë dhe më e rrezikshme në luftën detare.
Aktualisht, Kina ka futur në shërbim tetë anije të këtij tipi, pjesë e një flote që numëron mbi 370 njësi luftarake, duke e bërë marinën kineze më të madhen në botë për nga numri i anijeve. Çdo shkatërrues i Tipit 055 është i pajisur për të mbajtur deri në 112 raketa të llojeve të ndryshme, çka i jep aftësi të shumëfishta: nga mbrojtja ajrore, te lufta kundër nëndetëseve dhe sulmet ndaj objektivave detare apo tokësore.
Vendosja e shpejtë në shërbim e këtyre anijeve midis viteve 2020 dhe 2023 shihet si pjesë e një strategjie afatgjatë për të sfiduar dominimin detar amerikan, veçanërisht në Paqësorin Perëndimor, ku SHBA mbështetet fuqishëm te flota e saj e nëndetëseve. Në këtë kontekst, përmirësimi i vazhdueshëm i kapaciteteve anti-nëndetëse të Tipit 055 konsiderohet një element kyç i rivalitetit strategjik detar të shekullit XXI.
Këto “superanije” po shndërrohen gradualisht në shumëzues force për flotën kineze, duke ndryshuar ekuilibrat tradicionalë të fuqisë në dete dhe duke e bërë gjuetinë e nëndetëseve një nga betejat më vendimtare të luftës moderne detare.
