Një denoncim i rëndë publik hedh akuza serioze ndaj Inspektoratit të Mbrojtjes së Territorit (IMT) Tiranë, i cili akuzohet se ka vepruar me dhunë dhe në shkelje të ligjit për të uzurpuar një pronë private që disponon certifikatë të rregullt pronësie.
Sipas denoncimit, ndërhyrja është kryer me urdhër të drejtorit të IMT Tiranë, ndërsa në terren janë ushtruar presion, dhunë fizike dhe veprime arbitrare, pa vendim gjykate dhe jashtë çdo procedure ligjore.
Pronë me dokumente, por shteti me forcë
Prona në fjalë rezulton e regjistruar ligjërisht në emër të Sefer Pasmaxhiut, i cili pretendon se strukturat e IMT-së:
- kanë hequr rrethimin e pronës me forcë,
- kanë injoruar certifikatën e pronësisë,
- dhe kanë vepruar sikur prona të mos ekzistonte në regjistrat shtetërorë.
Denoncimi ngre dyshime të forta se këto veprime nuk janë të rastësishme, por janë kryer për t’i hapur rrugë përfitimit të një pale të tretë, konkretisht në favor të Ylli Ndroqit, duke e kthyer institucionin shtetëror në një vegël shërbimi për interesa private.
Dhuna si instrument shteti
Sipas pronarit, gjatë ndërhyrjes janë përdorur forma intimidimi dhe force, duke krijuar një situatë që ai e përshkruan si banditeske dhe jashtë çdo norme shtetërore. Ai pretendon se nuk i është komunikuar asnjë vendim, asnjë shkresë zyrtare dhe asnjë bazë ligjore për veprimet e IMT-së.
“Kur një institucion që duhet të mbrojë ligjin shndërrohet në mjet dhune, atëherë kemi të bëjmë me kapje të shtetit”, thuhet në denoncim.
Thirrje për hetim urgjent
Pronari kërkon hetim të menjëhershëm nga Prokuroria, duke kërkuar që të verifikohen:
- urdhrat e dhëna nga drejtuesit e IMT-së,
- shkeljet procedurale,
- ushtrimi i dhunës dhe shpërdorimi i detyrës,
- si dhe çdo lidhje e mundshme me interesa private.
Rasti ngre edhe një herë alarmin për pasigurinë e pronës private në Shqipëri, ku sipas denoncuesit, certifikata e pronësisë nuk të mbron nga dhuna e shtetit, nëse përballë ke interesa të fuqishme.
