Partia Socialiste duket se është vënë në gjendje alarmi pas një vale akuzash që kanë shpërthyer në media dhe në debatin publik, duke vënë në qendër kreun e Grupit Parlamentar socialist, Taulant Balla. Shkak është bërë një operacion i bujshëm i Prokurorisë së Posaçme (SPAK), në bashkëpunim me autoritetet italiane dhe Policinë e Shtetit, kundër një rrjeti “call center”-ash në Tiranë, të dyshuara për mashtrime financiare ndërkombëtare.
Menjëherë pas aksionit, në disa media dhe rrjete sociale nisën të qarkullojnë pretendime se pas subjekteve të goditura qëndronte Taulant Balla, së bashku me familjarë të tij. Akuzat ndezën një stuhi politike dhe mediatike, duke detyruar Partinë Socialiste të dalë në mbrojtje publike të një prej figurave kyçe të mazhorancës.
Nga Konferenca e Kryetarëve, nënkryetarja e Kuvendit dhe deputetja e PS, Klodiana Spahiu, e cilësoi situatën si një fushatë të orkestruar dezinformimi dhe shpifjeje. Ajo deklaroi se lajmet e publikuara janë të pavërteta dhe pa asnjë bazë faktike, duke akuzuar opozitën dhe ish-kryeministrin Sali Berisha për përhapje të qëllimshme të gënjeshtrave. Sipas saj, janë kaluar çdo kufi etik dhe ligjor duke sulmuar edhe familjarë të politikanëve.
Socialistët kërkuan hapur ndëshkime, madje edhe penale, për ata që – sipas tyre – prodhojnë dhe shpërndajnë lajme të rreme. “Raste të tilla nuk duhet të mbeten pa përgjegjësi”, ishte mesazhi i qartë i PS-së, e cila paralajmëroi një ofensivë kundër mediave dhe aktorëve politikë që, sipas saj, po përdorin shpifjen si armë politike.
Por përtej reagimit zyrtar, burime dhe zëra në opinionin publik flasin për një tjetër realitet: ndaj Taulant Ballës thuhet se SPAK ka në dorë një dosje të rëndë, të cilësuar si “përvëluese”. Sipas këtyre pretendimeve, emri i Ballës përmendet në përgjime të platformës “SKY ECC”, në kuadër të dosjes së njohur si 26/1, ku dyshohet për lidhje mes politikës dhe grupeve kriminale. Hetimet, sipas informacioneve, kanë hyrë në një fazë të nxehtë dhe pritet të sjellin zhvillime që mund të tronditin mazhorancën.
Në këtë klimë tensioni, edhe Sali Berisha ka hedhur akuza të forta ndaj Ballës, duke e quajtur atë “Tao i krimit dhe i Edi Ramës”. Berisha deklaroi se përgjigjen për Ballën do ta japin qytetarët në protestën e 24 janarit, duke paralajmëruar përballje të ashpër politike. Ai ka publikuar gjithashtu denoncime anonime, ku pretendohet se Balla lidhet me call center-a mashtrues, akuza që PS i ka cilësuar si shpifje të pastra.
Pavarësisht përpjekjeve të socialistëve për të mbyllur debatin, skandali duket se sapo ka nisur. Opinioni publik pret me interes lëvizjet e SPAK-ut, ndërsa frika brenda mazhorancës për një goditje të fortë ndaj zyrtarëve të lartë po bëhet gjithnjë e më e dukshme.
