Agjencia e Kombeve të Bashkuara për fëmijët ka ngritur alarmin për situatën e rëndë humanitare në Gaza, duke bërë të ditur se mbi 100 fëmijë kanë humbur jetën që nga shpallja e armëpushimit në fillim të tetorit.
Deklarata u bë nga zëdhënësi i UNICEF-it, James Elder, i cili tha se pavarësisht armëpushimit, bombardimet dhe operacionet ushtarake nuk janë ndalur.
Sipas tij, rreth 60 djem dhe 40 vajza janë vrarë gjatë kësaj periudhe. Shumica e viktimave janë shkaktuar nga sulme ajrore, goditje me dronë, granatime me tanke dhe armë zjarri, si edhe nga mbetje të pashpërthyera të luftës.
Elder theksoi se shifrat mund të jenë edhe më të larta, pasi të dhënat bazohen vetëm në rastet për të cilat ka informacion të verifikuar, ndërsa shumë zona mbeten të paarritshme për ekipet humanitare.
Ai bëri thirrje për ndalimin e menjëhershëm të dhunës dhe për garantimin e mbrojtjes së civilëve, veçanërisht të fëmijëve, duke nënvizuar se ata po vazhdojnë të paguajnë çmimin më të lartë të konfliktit.
