Ish-deputeti i Partisë Demokratike, Ervin Salianji, ka zbuluar prapaskena të forta brenda selisë blu, duke shpjeguar arsyet pse, sipas tij, një pjesë e drejtuesve të PD-së shmangin kritikën ndaj Niko Peleshit. I ftuar në një emision televiziv, Salianji mohoi akuzat se takimet e tij me demokratët në bazë i shërbejnë kryeministrit Edi Rama dhe hodhi akuza të drejtpërdrejta për bashkëpunime të fshehta në nivel lokal.
Duke iu referuar takimit të zhvilluar në Korçë, Salianji deklaroi se një pjesë e strukturave të PD-së janë të lidhura me Niko Peleshin, të cilin e cilësoi si “pronarin e qytetit”, për shkak të ndikimit që ai ushtron në emërimet në bashki dhe institucione të tjera vendore.
“Pse nuk e përmendin Niko Peleshin? Sepse kanë shokë dhe njerëz të tyre që i kanë futur në punë në bashki dhe institucione shtetërore. Kjo është arsyeja”, u shpreh Salianji.
Ai shtoi se në Korçë ekziston një “klub shokësh” që, sipas tij, kontrollon institucione të rëndësishme lokale, ndërsa një pjesë e drejtuesve të PD-së janë bërë pjesë e këtij rrethi interesi. Salianji deklaroi se persona që sot drejtojnë institucione në qytet kanë lidhje të drejtpërdrejta me këtë rrjet.
“E dini që Niko Peleshi është thuajse pronari i qytetit? Ka emëruar njerëz kudo dhe një pjesë e PD-së është kapur nga këto interesa”, tha ai.
Salianji kundërshtoi edhe pretendimet se takimet e tij dëmtojnë opozitën, duke theksuar se njerëzit që marrin pjesë në këto tubime janë demokratë që i shërbejnë PD-së dhe jo qeverisë.
“Si i shërbej unë Ramës kur në treçerekun e fjalimit tim sulmoj qeverinë? Problemi i vërtetë është pse po mblidhen njerëz dhe pse po flitet hapur”, u shpreh ai.
I pyetur nëse synon përballje me lidershipin aktual të PD-së, Salianji theksoi se beteja e tij nuk është kundër Partisë Demokratike, por kundër një lidershipi që, sipas tij, e ka marrë peng partinë.
“PD nuk është pronë e individëve. Të matemi me votë dhe me njerëzit”, përfundoi ai.
