Në intervistën e tij të parë pas operacionit të bujshëm në Venezuelë, Presidenti i SHBA-së Donald Trump deklaroi se ajo që ndodhi atje ishte vetëm fillimi i një strategjie shumë më të gjerë sigurie. Gjatë një bisede televizive, Trump njoftoi se vëmendja e administratës së tij po zhvendoset tashmë drejt Meksikës, me objektiv goditjen e karteleve të drogës që, sipas tij, “kanë marrë kontrollin real të territorit”.
Presidenti amerikan theksoi se Shtetet e Bashkuara kanë arritur të ndalojnë pothuajse 97% të trafikut të narkotikëve që vijnë nga deti, por sfida kryesore mbetet rruga tokësore. “Kartelet vrasin qindra mijëra njerëz çdo vit. Kjo nuk mund të tolerohet më. Tani po i ndjekim,” u shpreh Trump, duke paralajmëruar një fazë të re operacionesh policore dhe ushtarake.
Duke iu kthyer operacionit në Venezuelë, Trump e cilësoi misionin si të planifikuar në mënyrë perfekte, duke vënë në dukje se objektivi ndodhej në një zonë të fortifikuar rëndë, të mbrojtur nga mijëra ushtarë. Sipas tij, forcat amerikane arritën të kryenin misionin pa humbje dhe me efikasitet maksimal, çka e përforcon, sipas presidentit, superioritetin operacional të ushtrisë amerikane.
Sa i përket të ardhmes së Venezuelës, Trump deklaroi se vendi është i hapur për bashkëpunim dhe se SHBA-të po përgatisin hapa konkretë për rindërtimin e sektorit energjetik, përfshirë investime të mëdha në industrinë e naftës. Ai bëri të ditur se në ditët në vijim do të zhvillohen takime me drejtues të kompanive të mëdha të energjisë për të diskutuar rikthimin e kapaciteteve prodhuese.
Administrata e Trump e përshkruan këtë qasje si një doktrinë të re sigurie për hemisferën perëndimore, me tolerancë zero ndaj drogës, krimit të organizuar dhe hyrjes së paligjshme. Mesazhi i presidentit ishte i qartë: operacionet nuk ndalen në Venezuelë – beteja sapo ka hyrë në një fazë më të gjerë dhe më agresive.
