Një aksident i rëndë rrugor është regjistruar në orët e paradites së kësaj të mërkure në zonën e mbikalimit te “Pallati me Shigjeta”, në Tiranë, duke shkaktuar panik tek drejtuesit e automjeteve dhe kalimtarët.
Sipas informacioneve paraprake, dy automjete janë përplasur fuqishëm në rrethana që ende mbeten të paqarta. Si pasojë e impaktit të fortë, njëra nga makinat është përmbysur, ndërsa të dyja mjetet kanë pësuar dëme të konsiderueshme materiale.
Pamjet nga vendngjarja tregojnë forcën e përplasjes dhe bllokimin e pjesshëm të qarkullimit në këtë aks rrugor mjaft të frekuentuar.
Ende nuk ka informacion zyrtar nëse ka persona të lënduar, ndërsa policia dhe shërbimet e emergjencës ndodhen në vendngjarje dhe po punojnë për zbardhjen e shkaqeve të aksidentit, si dhe për normalizimin e trafikut.
Hetimet vijojnë për të përcaktuar përgjegjësitë dhe dinamikën e plotë të ngjarjes.
