Pas muajsh përgatitjesh intensive, të premten në mbrëmje forcat detare, ajrore dhe speciale amerikane morën urdhrin final për të goditur në zemër të pushtetit venezuelian dhe për të kapur Nicolás Maduron. Operacioni u autorizua personalisht nga presidenti Donald Trump dhe u ndoq në kohë reale jo nga Shtëpia e Bardhë, por nga rezidenca e tij private në Florida, Mar-a-Lago.
Sipas detajeve të publikuara nga media ndërkombëtare, operacioni ishte rezultat i një pune të gjatë inteligjence, ku çdo aspekt i jetës së Maduros ishte vënë nën mbikëqyrje ekstreme. Agjentët amerikanë monitoruan lëvizjet e tij ditore, oraret, ushqimin, mënyrën e veshjes dhe kontaktet personale. Mbikëqyrja shkoi në një nivel aq të detajuar, sa në radar hynë edhe kafshët shtëpiake të Maduros, për të kuptuar rutinën dhe momentet e dobëta të sigurisë në kompleksin e tij.
Operacioni, i koduar “Vendosmëria Absolute”, mori formë në fillim të dhjetorit pas simulimeve të shumta dhe ushtrimeve intensive. Trupat elitare amerikane u stërvitën duke përdorur një kopje në përmasa reale të rezidencës së sigurt të Maduros në Karakas, ku u praktikuan skenarë të ndryshëm të ndërhyrjes dhe nxjerrjes së objektivit.
Planifikimi u mbajt nën sekret absolut. As Kongresi amerikan nuk u informua paraprakisht për ndërhyrjen, një vendim që tregon nivelin e jashtëzakonshëm të fshehtësisë dhe ndjeshmërisë së misionit. Ndërhyrja reale zgjati vetëm dy orë e njëzet minuta, por ndikimi i saj ishte global.
Forcat amerikane vepruan me saktësi kirurgjikale, duke neutralizuar rezistencën dhe duke nxjerrë Maduron pa humbje të raportuara. Pamjet e kapjes së tij, të shoqëruar nga agjentë të administratës amerikane kundër drogës, u shpërndanë me shpejtësi dhe shkaktuan tronditje në opinionin ndërkombëtar.
Ky operacion konsiderohet si një nga ndërhyrjet më të guximshme dhe të sofistikuara amerikane në Amerikën Latine që nga fundi i Luftës së Ftohtë, duke rishkruar rregullat e lojës për ndërhyrjet ushtarake dhe inteligjencën globale.
