Presidentja e Parlamentit Evropian ka reaguar për zhvillimet e fundit në Venezuelë, duke theksuar se populli venezuelian meriton të jetojë i lirë pas viteve të gjata shtypjeje.
Në një reagim publik, ajo deklaroi se Parlamenti Evropian nuk e njeh Nicolás Maduron si president të zgjedhur ligjërisht të Venezuelës dhe se situata aktuale përbën një moment vendimtar për të ardhmen e vendit.
“Venezuela do të jetë e lirë. Populli i saj meriton demokraci, liri dhe dinjitet pas kaq shumë vitesh represioni”, u shpreh ajo, duke shtuar se orët dhe ditët në vijim do të jenë kyçe për rrjedhën politike të vendit.
Presidentja rikujtoi se Parlamenti Evropian ka mbajtur vazhdimisht një qëndrim të qartë në mbështetje të vullnetit të popullit venezuelian dhe në mbrojtje të parimeve demokratike.
Ajo theksoi se Bashkimi Evropian do të vazhdojë të kërkojë respektimin e së drejtës ndërkombëtare dhe të mbështesë një zgjidhje paqësore, demokratike dhe gjithëpërfshirëse për krizën në Venezuelë, me synim rikthimin e stabilitetit dhe shpresës për qytetarët e saj.
